Vanê, welatê biyo. Ez vaci 4-5 miloni, sıma vacê 6-7 miloni insani ko u gerıs, deşt u warunê ni welati de weşiya xo ramıta.
Zamanê na welat de her suke de pasaê, her dewe aĝaê de xo biyo. Her kes xoser, her kes serbest biyo.
Ju zon qesey kerdo, hama xo ju name ra name nêkerdo. Her kesi xo namê aşira xo sero mordo. Eke juyo de xam bıperso, vazo, tı kama, çı kesa, çı mıleta, vato felan aşire raune.
Geganê şiyê welatunê düri, dine ra pers kerdo, sıma kamiyê, çı kêsê, çı nasê? Namê mıletê xo vacê, namê welatê xo vacê; vato, ma maime, kou raime, namê aşira ma esto.
Teber de adet heni biyo, reyna pers kerdo, ma eke hênyo, namê zonê sıma çıko? Vato, namê zonê ma zonê mao. Heya zonê sımao, hama namê xo çıko?
Vato, çıqa ke aşiri estê, hondê namê xo esto, her kes wairê zonê xuyo. Jü zono, hama her dere de, her deşte de namê xo zobinao. Her aşire wirê hardê xuya.
İ ki hên cuab do, perskerdoĝi thaba nêşiyê ser.
Ma vato, namê qıralê sıma, pasaê sıma çıko, kamo, thaba kes nas keno?
İne oncia vato, ma de hazar u ju qrali, hazar u ju pasai estê.
Hem ki pasa u qrali wirê her çi niyê.
İ ki zê ma gurinê, ma ki pê qail nêbime, pasao de bini name kenime.
Kesi pê vatena inu inam nêkerdo.
Vato, no çax de, welato de nianên, qomo de nianên esto?
Vacıme ke esto, ma çıqa pay ra maneno?
Na ju sanıke niya.
Hama sıma zê sanıke bıwanê.
Vanê, zamanê ra tepia hal u demê na welati vuriyo.
Ciranê ninu çım verdo ra welatê ninu.
Ciran ki mevacê, verg vacê, hasa vergi ra. Verg yeno miye cêno, sono weno, heştê, asmê nêno. Ciranê ninu heni nêbiyê. Ninu wasto ke wairê her çi bê.
Wairê zamani bıbê.
Hem ki zaf baqıl biyê.
Vato, bêrê pêrinê xo rê dısmên mekerime. Mordemunê xo bırusnime, ala miyanê aşiru de çı esto? Kam, kami ra gerreciyo, qarino, rınd bımusime, game be game bıcerime xo dest.
Mabênê dinu de ju zaf baqıl biyo. Vato, ma ceng mekerime. Aşiru pê verdime, kamcı aşire ke tenê qewetına, debara xo hurêndi de ra, tenê avêr şiya, verba a aşiri i binu thız kerime, pê verdime, çek u perê bıderime. İ xo be xo xo qedênenê.
Ma, xo bilasebeb meqefelnime.
Nia game be game têdine cenime bınê bandıraê xo.
Heni ki kerdo.
Zamanê ra tepia ne aĝa u pasa mendo, ne ki hardê aşiru.
Teyna namê aşiru mendo.
Na ju sanıke niya.
Hama sıma zê sanıke bıwanê.
O welato ke zê gul u gulistaniyo, biyo tar u mar, bınê lıngu de şiyo.
Her çi dest ra veciyo, o qomo sareberz, o qomo zerrewes şiyo, ra u rêçe vuriya, hardê xo de biyê koley.
Heya taê verba cı veciyê. Hama sernêkotê. Zaferi kıstê, pag u wari vêsnê, iyê ke merdê merdê, iyê ke nêmerdê neme ra zêdei rusnê surgıniyê. Düri.
Zaf tengiye onta, xeylê çetıniye diya.
Ne hukmê xo, ne wariyetê xo mendo.
Game be game, roce be roce biyê xamê xo.
Vuriyê.
Pasa u aĝaê newey oncia ki razi nêbiyê.
Vato, heya hukım ma dest de ro, hard ma dest de ro. Hama no bes niyo. Hona itiqatê xo ramenê, hona zonê xo qesey kenê. Nia ke şêro, ewro ke mebo meste, meste ke mebo birro reyna yenê ra xo, hukımrania ma rıznenê.
Çıtur ke mı va, ê dinê ki wezirê xo, zanoĝê xo, aqıldarê xo estbiyo.
Hem ki zaf baqıl, zaf xori fıkıriyê.
Amê têlewe, no hure, ju senık, juyo de bin zêde vato, peynia peyniye de qesa xo arda ra ju gavari ser.
Vato, eke ke wazenime wirê no hardi bımanime, gune itiqatê ninu, zonê ninu bıvurnime. Endi kes pê o itiqati inam mekero, endi kes pê o zoni qesey mekero. Qeseykerdene uca de bımano, i zoni qıc bıvino, hurêndia zoni mekero. Kamo ke o zono khan caverdano, zono newe ra qesey keno, nusneno, ey bıgoynime, halete cı derime, zono newe ra qeseykerdiş u nustişi zê ju avêrşiyaiş, mordembiyaiş bımusnime cı.
Eke ke ju ya ki taê o zono khan de qesey kenê, nusnenê, verba cı bıvecime, inu qıc bımusnime, hên bıkerime ke kes qımet inu medero.
Vato, mordem şikino ju ca, ju welati bıcero xo dest, hama hata ke sarrê ocay zonê xo qesey keno, mordem nêşikino wairê ocay bo. Oncia vato, roca ke sarrê o welati zonê xo caverdano, zonê sıma qesey keno, a roce sıma benê wirê i welati.
O welat endi ê sımao.
Heya, aqıldarê xo, zanoĝê xo zaf xori u hira fıkıriyê.
Gunê heqa mordemeku bıderime cı!
Karê xo zanıto…
Na ju sanıke niya.
Hama sıma şikinê zê ju sanıke bıwanê.
Xeylê waxt vêrdo ra…
Rocê taê insana vato, nia nêsono.
Ma hardê xo de, pag u warê xo de hesirime.
Waxt vêreno ra, nia ke şêro binê tici de, serê hardi de ma ra çivikê nêmaneno. Vindi benime, sonime.
Na xebere biya vıla, vırênde kesi alaqa nêmusna cı.
Welat de ters estbiyo, zobina derd u persi estbiyê.
Zêderi vato, dava hêça, gos pa mekuyê. Honde belay ma seroyê, ala vınderê.
Teberê welati de honde ters çinêbiyo.
Welat ra düri taê amê têlewe, xo miyan de qesey kerdo, vato, ma mecburime ke caê ra sıftê bıkerime.
Se kerime, se nêkerime, çı rasto, çı ĝeleto, verba çıkimê, verba çık nime, qeseykerdo, qeseykerdo…
Taine vato, dostêni, wa u bıraêne;
Sıma vinenê, dina gırsa, ma qıckekime, zaman rew vêreno ra.
Hona ke waxt esto destê xo çip bıcerime…
Peynia peyniye de hêkata derge, çekuya kılme ra vato:
Ma ki ju qomime. Çiyo ke ma dest ra gurêto peyser bıwazime.
Hama çıtur?
Her çi biyo vıla, her sare ju qesa, her dorme ra des nusqa nuşiyo.
Pers niyo, gılendıka hazar serriya, oloziya be jubini, ra nêbena…
Na ju sanıke niya.
Hama sıma zê ju sanıke bıwanê.
Nia ez vaci des serri, sıma vacê hirıs serre vêrda ra.
Jü sıpê vato, jü şia…
Taine ki vato, ciranunê xo, aĝaunê xo meqarnime, ala se beno…
Rocê oncia amê têlewe qesey kerdo, venga kokımunê xo, zanoĝune xo kerdo, vato, reyna bıcerebnime. Nia nêsono, ya rae vinenime, ya ki….
Têdine rê çekuya ke ya ki ra dıma yena, manê a çekuye zaf gıran amo.
Xo gunekar, xo sucdar diyo.
A lınge ra tepia vato:
Heya gunê her çiyê xo peyser bıcerime.
Hama no heni helmê de, gamê de nêbeno.
Nara tepia gos ro jubini dime.
Qımetê jubini bızonime.
Ma dêndarê jubinime.
Eke wazenime her çiyê xo peyser bıcerime.
Vırênde “Xo” bime, dıma “Ma”.
Xo u Ma…
Ma key ke Xo u Ma bime…
Her çiyê xo ewro ke mebo meste, meste ke mebo birro peyser cenime.
Na ju sanıke niya.
Sıma oncia ki zê ju sanıke bıwanê.