(Alêyder ve Ğezale raye ra rastê jumin benê, dıma hên helmê, ju nınge ser tenê kunê mobet.)
Ğezale: Weyy, nu Al Hêyderê mawu!… Alo Alo; nia sona koti?
Alêyder: Weyy, Ğezal; tuya? Ma heya, şiyayena mı beliya. Ma tu sona koti na satê de; na tari de. Nia de, endi hevê mendo ke muğurbe wo!
Ğezale: Se kena, Alêyder?
Alêyder: Wes u var be; na helm de ez rındo. Heq tora raji wo, tu çutiriya?
Ğezale: Ez ki rındo. Tu ki wes u war bê. Ma na thaw helmê bınê gula ma dero, sebkerime.
Alêyder: Ee, rınd rınd; çı rınd, sa büne.
Ğezale: Mı va, tu sona koti? Hama tu qese mı cüav nêkerd; est pê gosê hu!
Al Hêyder: Nê Ğezal, Heq kena şeri koti? Xore na hetê Mamêkiye ser son.
Ğezale: Sona Mamêkiye se kena; çı karê tu esto?
Alêyder: Son tayê çi mi hêrinon. A muwa mına feqıre, çita hu dıriya na biya phincrar şiya! Son ayerê çitê-mite ve tayê çiyê bini têdarık kon. A bırawunê wawunê xorê ki tayê purti-murti hêrinon. Piyê mı ki, ondêr qılawunê xo şikiyo, ala nêuz thowa vinon nivinon; ey ki Heq zonenu. Duman mı mejêro, piyê mı gos u kherikê ma berdê. Çond rojiyo ke boyna vano, “Qlawunê mı şikiyo, bêtutın mezgê sarê mı darino we. Qılawınê mı ki ondêr rındek bi, hewl bi; darê gürgeni ra bi… Yamu yamu Alêyder, uncia çiyo de hewl bızê.” Yaw, nu taliyê mıno şia de niade; halla halla! Ma qılawun di, nafa ki gürgen mend.
Ğezale: Wıyy, Hêyder, ez qêda! Hevê mend ez xu vira bıkeri. Ma hona “Gêrmia Yimamu’ nêpota. Ma “Rozê Yimamu” xo peyde caverday, qedenay. Hama gêrmi mende. Xırawo, ez qêda. Ez tenê pangnot u peru todi, tu mırê dıng, ezkızu, bosmezu, fındıqu, fıstıqu; endi ke çı lozımo bıhêrne. Nia de, fındiqi, fıstiqi butu pia ‘des u dı çeşit’ vê. Yamu yamu, ez qeda. Tu ve Xızıri kena xo vira meke! Ero, xêr kena ha. Seker ki bızê, hama kêle mezê, toz vu. Torê zamet.”
Alêyder: Nê-erê heya heya, ça honde kena’ra derg? A-qa, ma ki zoneme, Gêrmiya Yimamu rê çık lozımo. Halla halla, yaw tu hên zonena ke, tu domanêk kena têmey. Thowbe thowbe!..
Ğezale: Ero, bomo bomo; ni ni! Tu ça xo rê nia qar cêna; bêmırod! Ez terson ke tu xo vira bıkerê. Raya Mamekiye duriya, reyna kam şikino sono cêno. Tenê aqılê tu hawrawu, coka ez nia tu çipa-çip temey kon.
Alêyder: Yaw, Heq kena veng meke, mı meqarne! Bıde mı na peru, su çê xo. Nia de raya çêyi naca ra vosmeşêrde sona. Xêrê ser su. Su ke, ez ki egle mevi; ra u olağa xora şeri. Hona ke sewe rınd zulamete nêbiya, ez şeri. Raya mı hona xeyle esta. Xora asme ki çina, hevê sewle, heve roşti bıdo..
Ğezale: Su su, mı qadayê can; su! Ra u olağu tu rakerdaye bo; su! Su ez qêda; xêrê ser su, xêrê ser bê. Nınga tu kemerê negıno sola!..
Alêyder: Wes u var be, dê hayde. Raya mı sera bıveciye ez endi şêri, mırê mısada.
Ğezale: Oğur vo, canê’m, oğur vo; evê weşiye su, bi!
Alêyder: Dı hayde, sewa xêrê; na sate xatırve tu.
Ğezale: Oğur bo, mı qadayê cani, oğur bo; su su, muğurbe mekuye!..
(Al Heyder benu rast. Sono reseno Mamekiye. A sewe sono çê bırayê xo, uca benu meyman. Roza bine urzeno ra, sono çarsi, xorê tayê purti-murti cêno. “Ondêr qılawın ki çino” xo-xode vano, “Tew, ez ke nıka şino çê, ‘veyvê mıno’. Piyê mı, mı hên wesa-wes weno, na dına ki mı ser keno tari. Duman mı mejero, ez nıka seb’keri? ‘Nêuz, kes sono Xarpêt, Xarpêt ra bıwajime’. Dıma u, çiyo ke seweta Gêrmiya Yimamu, purti-murtiye wayunê xo, çita muwa xo hêrineno. Peyser kuno ra u olağa dewa xo. Yenu ke solıx puleşiyo pıro; hên wu hal, xo erzeno çê Ğezale.)
Aleyder: Ma ve xêr di, Ğezal; nawu ez amunê!
Ğezale: Weyy, tuya; xêr ama, ez qêda!
Alêyder: Xer mêndi me. Se kena vijeri ra nat. Wesa rında? Oxx, tu çay ki nu ser, çı wes, çı wes! Lewe de pêsare ki poto.
Ğezale: Ma, mı zona ke tu ewru, na sate de yena. Thowa hotelê piye tu esto Mamekiye de bıvındê, egle vê; ju wu çê bırayê tuyê feqir esto, zowina kes-kusê sıma uca çino.
Aleyder: Ya, rast vana! Yaw, qe pers meke. A qa Mamekiya, ondêr sene Mamekiya! ‘Heq duri bero!’ Hên ke serd u sext esto, honde veşêr. Nia xağê isoni wu serd vera puroşinê ru. Wu serd nia isoni phırezneno ru, ‘kutık vo, kutık gêver beno.’ Qe pers meke, her çi ki zof bahaliyo. ‘Yê heqa mılet u qomê marê, Heq bınê hardi de husk kero.’ Mıletê mawu Kırmanc ki bêvicdaniyo, bêyimaniyo. Fiyatê na çimi, ‘tu hên zona gonia xo vanê.’
Neyse, a ha nawu, na çiyo ke tu wasto, nawu! Nu, mı tam des u dı çêşid gurêto. Qe ju tek kemiya xu çina. Hama sekero toz çinê bi, mı ki hurindiya sekero toz de kele guret. Tenê ki bi kêmi, qusırê mıde nia mede! Mı raye ra tek ve tek est xo fek, hata ke amune. Seb’keri, ondêr zof şirenu, isu damiş nêbeno.
Ğezale: Ero, budala budala! Tu ça seker nia solt wena, bena nêwes. Tu thowa domaneka, ayvo ayv… Ala bıde nu filê xo, nu çiyê tu ki thıka, peyê çêveri de roni. Qe ke nêvo, eke şiya xo vira mekerê. Ondêr, na rozu ez biyo farmasız; aqıl ki mı sare de nêmendo, nêuz ça ez nia büne.
Alêyder: Nê Ğezal, ala wu nê, ez tora çiye pers kon: Mı esmu hewn di. Hama hewno de xıravin vi.
Ğezale: Nê-ero, uwe de şero, uwe de! Heq xêr kero, bıçarno xêre!’ Vaze ala, nu sene hewno nia têlmaso.
Alêyder: Tawi, helvet xêr vo!; uwe de ki şêro! Hama uncia ki vınde, ez torê qesey kon:
“Hewnê mıde ju zelzele bivi. Dıma na zelzeleyi, na bonê sıma rijiyay bi, tu bınê bonu de mend bi…”.
Ğezale: Nê-ero, ‘Heq nêkero!’ U çıko tu hên qesey kena, halla halla! Yaw, nu tali u tezelê made niade ala..! U senê hewno hen nolêtmewu. Zurêker zurêker!.. Yaw, tu ve Heq kena, mı meqarne! Heq belayê xu tu nêdo sola! Ez tora zobina se vaji; nêzonon ke, tu ça honde zurrekera!?
Alêyder: Erê Xızır bo! Nia vaji ke, tu yinam bıkerê. Mı ke hewno de nianen nêvinetêne, koti ra nia zurê de nianen şikin bıerzi. Dêma ke mı hewn diyo ke, nia torê qesey kon. Halla halla!, yaw tu isoni kena bınê guna!
Ğezale: Ero ayvo ayv, noletmeni meke, bota su! Ala neyde nia de yaw! Nu tezelê mıde nia de; mı hên wesa-wes kenu bınê herdi. La-lau aha, nu filê tuyo, nu ki çiyê tuyo. Xode bızê su! Towbe towbe! Vano, ‘zelzele biyo, dêsê boni rıjiyo, gıno pıro, tu bıne de menda’; halla halla!, Heq bıçarno’ra xêre, se vaji! Yaw Heq kena, tora rew van na çiyê-miyê xu bızê su. Ma ki va ke Alêyder raye ra yenu, qefeliyo, çay sernine eve pêsare çay bısımime. Ez çızon ke Alêyder raye ra mı ser dame nano ro. Yenu mı qarnenu. Heq belaê xo tu nêdo, nıka ez zowina se vaji tora…
Alêyder: Yaw aywo. Hau tu endi zowtu ki dana mıro. Nê, ez seb keri? Ez çı pêskarê is u karê Heqi bi. Ez van nia nia bi, tu heredina mıra. Owu ke heredina mıra, bıherediye Heqi ra!..
Ğezale: Yaw bota su, bota, tu ve Xızıri kena kena bota su! Su belayê xu cawo bin de bıfeteliye! Nia de zof derg meke, nıka na koliyo tern qafıka tode dan pıro; qafıka to sıknon, gonia sure verdan tu ser. Mı guna ver meke tu ve Xızıri kena. Nu sene sans u tezelê mıno şiawu yaw, yeno xu soynenu isoni!
Alêyder: De temam temam, meqariye! Ez xorê peskarê tu büne. Mı va ke, tenê lax bıkerime; tu bıqarni. Xorê lax kon, hewno-mewno nianen çinê bi; zelzele-melzele ki nêbi. Tu ki bınê boni de nêmenda. Nia de, tu hawa payrawa, jê aslaniya. Ez qedayê tu bijeri ‘Gulizara m’.
(Va ke, filê xo dest te bi tever. Ğezale, na çekuya peyene ra sas biye. Nêzona ke seb’keru, biye çowt hên verê xode, ju lastıko şia verê şêmıga çêveri ra guret, peyra kuya Alêyderi ra. Dıma eve huyayis, “Nêro bêmırod; Gulizare kama? ‘Gulizare’ ha; tu vınde, ez ciyê daye kon verê tu, tu hên bıke, çıke bıvo tu rozê reyna yena hete mı ser.
Alêyder hetê ra raya çê xo ser şiyêne, hetê ra ki dıma xo nia dêne. Riwayis bi, boyna huyiyêne. Vengê Ğezale hona amêne gos. Destê xo Ğezale rê boyna sanêne ra, huyiyêne…)
________________________
Eskişahar; asma Gağani 2019
