Ma sare Desimu sero zof çi nusiya, zof çi ki ardo ra zu. Çıxa ke kemeniya xo esta ki ma sero nusnayiş jediye, zere na nusnayisu de uwo ke kemi mendo, kes ra nêkeno o ki itıqato.
Ma na dewur de na itıqati sero xo nêqefelneme. Pir, rayver, mürşidu ki deste xo na itıqat ra wento. Herg ju çiye va, çiye nusna. Hama, ma cae nuğde sero aqıl jubini de têsare nêkerd ke na itıqate ma çıko. Ne Pir u murşid u rayveru areze kerd, ne ki çiyo de nusnae esto ke ma deyra raa xo bıramime. Vengê xo bırno, sarê xo fişto zerê qumi, cıra nêvezenê.
Eke çiyê vajiyo ki zof senık areze kerdo, tepiya vengê xo bırno. İtade onca na mesela ken ra ke pir, rayver u murşiduna vengê xo tenê berz vejiyo. Vaze, aleveniya ma sarê Desimu nawa, raa ma nianêna. Pir, rayver u murşiduna van, iye ke vanê ma uzağolime dinura van, iye ke vanê, ma jar u diyarunê Dêsım rê wair vejime dinura van. Çıxa ke wendisê sıma çino, çıxa ke sıma vanê, kes gos ro ma nênano, gereke sıma qesê xuyo pêên vazê. Sıma ke yê talıvuna çıralıx nêgureto ki, pi u khalukunê sıma gureto. Gereke sıma ey xorê helal kere. Sıma ke cırê wairên nêkerde, bine guna de manene. Guna dinu bena xapa şiae, vılê sımara gırêdina, çıqa ke ma nae sero hure nime, rındek areze kerime itıqatê xo honde ave beme, cırê wairên keme. Sıma ke bê veng mendi, rınd areze nêkerd talıvê sıma raa xo satnenê, sıma ki a guna de barebıroğê.
Kamij pir, rayver, murşid de ke qesey keme vanê, ma ewladê resulime vêrenê ra, orte ra vejine. Pers keme vame, na ewladê resuleni çıka, çıturiya mare bınge ra qesey bıkere, mare tarif kere. Keşi ra phızine nêvejina.
Çiyo ke ez zonen uzağoli vatene. Çı ke i pero wairê ewliyay bi. Khureş, Bomosur, Ağuiçen ma dinere uzğoli vatêne. Ewro vanê, ma Mısılmanime, Qurane yê mawa. Pers keme vame, mare nae tenê zalal kere ke ma raa xo bızonime; wortê Uzağoliyeniu be Mısılmanêni de çı ferq esto marê ninu areze kere, keş ra veng nevejino.
Vırende ma ke sond werdêne, ma xorê jar u diyaru sero sond werdêne, cem u cemate ma na zon ra biyene. Dara mosimê pak ra na zon de vınetêne, na zon ra ardêne war. Caê xo vetena mısayivu ki na zon ra biye. Nıka pêro çarnê Tirki. Cemu de zerê isoni nêgirino, çım ra ju hesre nina war.
İtade onca venga pir, rayver u murşidu dan. Sıma hata nıka na rae ebe qesa feki arda. Jar u diyarê ma sımara raji be. Wendisê sıma çino, venga ju de, deyrê qesey kerê, o ki bijero qeleme. Hem namê sıma maneno, hem itıqatê xorê xızmete kene, çiyê pêyde maneno. Belka tede senikêni manena, belka pêro sıma vir nino, belka nemezet maneno. Axiri rozê ju vejino qayitê dinu beno, çiyê de bin o keno ser, na homete de maneno.
Jar u diyarê ma weşiye sıma dê.