Vırende itıqate made cem de ju pars kerdene. Name xo Salman-ı Pak bi. Salman jüyo fıqareo, wayirê jêde domonuno. Lınga xuya jüye lenga, hem ki kokımo. Diliğê xo parskerdene ra nano ro. Xorê cemu ra fetelino.
Woxto jü de jü cem nêreseno. Axiri peydo sono, reseno cı. O ki loqmê xo, jiyarciyê ke uzarê, dinu ra cêno. Jüy ke loqme cı nêda, piri de beno dawaci. Salman ke çêver de ame zerre, vengo berz ra vano:
– Ya pirê Oli Diwani! Qurvanê lınga to ben. Cem u cemat tepiş ke, meverde şêrê.
Yeno ortê meydani de dara mosımê paki de vındeno, vano:
– Ya pirê mı, ez zof düri ra yen. Serdo, puko, zof vore vora. Halê mı tora aseno. Lınge ra nizeyen, hondê amune, restune wayirê hurdêna medet u murweti. Rızqê çel u çukê xo cem u cematu ra ken arê. Dest bıde, xorê loqmê heqiye arê dine.
Pir vano:
– Kokhımi de ordım kerê, kokhım loqmê xo arê do.
Di-hirê teni Salmani de danê arê, yenê ortê meydani. Vano:
– Pirê mi, Heqê homete ma bê sıma, sıma bê ma mekero. Mı loqmê xo pêrune ra gureto. Heqê homete pêrune ra raji vo. Ma bê pir, bê rayver nêverdo. Loqmê xora loqmê dano piri.
Axiriya Salmani ki nia yêna.
Mesela na Salman-ı Pak mı laze bavalığe mı Aliyê Qızi Binali ra hesnê. Heq rama xo ro cı kero xêyle serri esto mara bıriya ra şi heqiya xo. Nıka cem u cematu de ki xêr nemendo, hergu ju çiye vano.
Ma raa xorê besar nêkeme ke wayir vejime.
Ma zone xora itıqatê xora zof kotime duri.
Hemê çiyê ma çarna re Tırki, ma werte de bime hewt u pangele şime.
Onca ki ye jar u diyarê ma, ma xo vira mekere.