Sarê Mergarıji payız ra hata amnon şiyenê gomu. Gomê xo ki Derê Çeqero de Uto de bi. A sere çê Wuşenê Hengi ra Dursınali ve hermeta ho Qeyfa, çê Ali Xıdır ra Dewrês Heyder ve hermeta ho Gulizar’e ra, çê Wuşene Hemedi ra Sey Bava ve hermeta ho Xaskare, çê Aliye Wuşen ra ki lazê Ap Bertali Sey Mursa ve hermeta ho Hewese ra gomo de mal sero benê. Uto de zımıstoni mal weyi kerdene zof çetın bena, gegané xeylê vore vorena. Ray butu qapa benê. Dursınali, Sey Mursa, Sey Bava ve Dewreşi ra her sodır mal kenê ho ver, benê bırr. Vore hen zof vorena ke, çor cirano ra kes nêşkino ke mal ver şero. Daera mal kenê ho ver, eve ho ki kunera mal dıme, raa ke mali kerda ra a rae ra sonê, yenê.
Rozê sodır urzene ra, mal danê arê, fine ra ho ver, onca kune ra rae. Werte bızo de tuskê de Sey Mursay beno, xuya ho zof xıravıne bena . Zof arnağ beno. No tusk gegane kuno ra mal ver, tenê sono, wera dıme vındeno. Nê nata sono, nê bota sono. Lıngonê ho saneno hard hen vındeno. Ciranê ke mal dımerayê tuski ra qarinê, heredinê. Nia danê ke, tusk xo nêlewneno, werte ra zu kose mal de rae keno ra, hem sono mali ver, hemi ki tuski ra mılqi keno.
Roze Dursınali rusnenê mal ver. Dursınali sono, tusk thon dano, rae keno ra. Na rual de pêro pia onca kune ra rae sonê. Sonê, cao ke bırr esto wuza vındenê, ağme benê. Sey Mursa ve Sey Bavay ra tae mal cenê heto zu ra sonê, Dursınali ve Dewreş ra ki malê bini cenê heto bin ra sonê.
Dursınali ve Dewrêşi ra telewe de vejinê daro ser, koçe bırnenê. Dursınali nia dano ke, lea koçeni hona hard neşiya tuske Şey Mursay resone cı, cêno perune weno. Nêverdano ke, bızê bini ki tenê koçe borê. Zu nia, dı nia, Dursınali qarino. Wu hers ra ho dare ra erzeno war, dımê dariye ra juye dano werte iştironê tuski ro. Hasa sıma ra, vano “Mıde na q… nae, rayera bese nékeno ke lıngê berzo, tha ki nêwerdano ke na bıji hevıkê koçe borê!“ Wu waxt Dewrês vatena Dursınali hesneno, hama veng nêkeno, hata ke karê ho qedêna, butı amey tê lewe.
Çoremena cirâni karê ho qedênenê, onca yênê têlewe. Sey Mursa ve Sey Bavay ra qutonê xuyê tutini vezenê, cığaronê xo phisenê tê ra. Daera dıma ki qutu danê Dursınali u Dewreşi. Yi ki her zu horê cığara pisenê têra. Nia dane ke, Dewrês tenê mırozıno, tenê tenge dero. Sey Mursa pers keno, vano:
- Dewrês xêra, se bi?”
Dewrês, cığara hora gepê onceno, dıma vano:
- Wullahi ez kêwra Dursınali ra dawacıyo. Ewro male Haqi ra mılqi kerd, xıravo.
Sey Bava u Sey Mursa’y ra zuvinde nia denê, hem bınê zımelo ra hoveho huyinê, hem ki çım şiknenê zuvini. Sey Mursa vano:
- Ma heno, zof xıravo. Tı dewresa, gereke cırmê Dursınali tı ronê.
Dewrês vano:
- Ya bıra Sey Mursa, tı qesa de haqe vana, ezi ki hen ken.
Dewrês Heyder mordemo de zof zere pak beno. Cırm bırnaene de ki niwazeno ke qelvê ju bıskıno. Tenê vındeno, wera dıme qeseykeno, vano:
- Ma ke nıka şimê çê ez Gule ra van bızıke pozo. Ez ki a bızıke marê ken şir. Kewra Dursınali ki şêro Heniyo Pil ra wue biaro. Wua Heniye Pil zof wesa. Cırmê dêy ki a wue ardene bo. Sımake qayıl benê, ez van nia bıkeme.
İye bini hen ke çapık vane ‘Ya, ya, ma rajime, Haq ki tora raji bo’, tıvana belka qesê ho zu fek ra vejinê. Cığaronê ho ke sımenê qedenenê, mali ki fine ra ho ver, raa gomo cênê. Rae ra kunê ra zuvin, zuvin de xeylê yaraniye kenê. E ke amey gomo, mal kenê zere, sonê çe.
Dursınali ğızıkê wue cêno, tosa wue ki dêm dano nano ho sare, raa Heniyê Pili cêno ho ver. Wu waxt veyva çê ap Bertali Xeycane verê çêver de bena, Dursınali vênena. Nia dana ke, Dursınali tose na ra ho sare, hem ğızıko ke dest dero ey saneno ra, hemı ki fitıke cıneno. Xeycane sas bena, venga zeri dana, vana:
- Wuy wuy wuy, nê Mursa Mursa hala bê tever. Na Dursınali ez van aqılê xo sas kerdo, biyo bom.
Sey Mursa yeno verê çêvêri, Dursınali‘de nia dano huyino. Vano:
- Vêyvê vêyvê, wu bom nêbiyo. Cırmê xo esto, ey ano hurendi.
Dursınali ğızıkê ho wua Heniye Pili ra keno pır, tosa ho cêno, pêyser cêreno ra. Dota ke ame, vengâ Sey Bavay dano, piya sonê çê Sey Mursay. Hiremena ki zof sa benê. Zonenê ke, Dewrês mordemo de rasto, qese hode vındeno. Werte ra xeylê waxt sono, nêsono, Dewrês çêver de kuno zere. Şiniya şira ke vırare dera ano xoncıke sero nano ro. Butı pia dormê xoncıke de yenê têlewe, neqeline şiri ver.
A sewa çheli de, tevera tayr u tur hewnde beno. Zu vergi vesaniye ra zurenê. Zere de ki, çor çirani şir wenê, pizê ho kenê mırd, dıma ki, wua Heniye Pil ra adırde çay dem kenê. Sey Bava, Sey Mursa, Dursınali hem çayê xo fırt kenê, hem bınê zımelo ra huyinê, hemı ki Dewreş ra mınete kenê. Hoveho vane:
- Haq na mordemê paki bijero bınê peronê xo, bısevekno.