Naera 80ê serre ravêr, 4ê Gulana 1937 de Dewleta Tırki meclisê xora “TUNCELİ TENKİL HAREKATINA DAİR BAKANLAR KURULU KARARI“ vet. Dıma eskerê xo ruşna Hardo Dewrêş qomê mao bê suj u bê guna qır kerd.
Qomê ma nê şibi kewt bi welat u hardê kesi, ne ki waştêne ke kesi bıcêro bınê bandıra xo. Qomê ma zaf qimet dêne xoserbiyene, cad kerdê ke weşiya xo ze waştena xo bıramo, bınê bandıre mekuyo. Coka verba goneweri, hondê ke desbera xora ame, xo mudafa kerd bi.
Dewleta Tırki ki na xoserbiyena ra xof kerdêne. İnu çım de Dêsım belaê de gırs bi, çıke wairê bıngey bi. Xora nêvatêne Tırk, vatêne Kırmanc, welatê xora nêvatêne Türkiye, vatêne Kırmanciye, vatêne Dêsım ; zonê xo Kırmancki-Zazaki-Dımılki, raa xo ki İtıqatê Kırmanciye, Raa Heqi name kerdêne. Yanê bıngê xo qewim bi, xav nêbi.
İ goni ra mırd nêbiyêne, gonia Koçgiriye u Zazaunê cêri cırê kêmi ama bi. Coka serdarê inu Mısto Kori be taxımê xora vat bi, « Mesela Dêsımi ze jü kergana, gereke na kergane koke ra cıra bo, hên hal bo ! »
İna ebe metodanê xo mesela hal kerd bi !
Kokım, doman, hermete, cüamêrdo bê çheke, cêniya dıgane, çêneka azebe, pil ra be qıc devadev 70 hazar isan qır kerd bi.
Dıma ki name ”isyan” na bi pa ke, ebe na qeyde suc u guna xo werte ra wedarê.
Hama dem u dewran vurino, tarıx şahado ke Dêsım hona ki koka xo serao, kamiye, zon u itıqatê xora payrao, pay ra maneno.
Roê neçar u bê pırên şiyaênanê ma şad bo.