Vore dar u ber gureti vi ra xo ver. Çımê keşi era hardê dewrêşi nêgınêne. Hondo ke gılê daru vore sera şia kerdene. Theyr – thur, coliyê yavani çıturi pizê xo kerdêne mırd, keşi nêzonêne. Her can zobina jü teles de vi. Pêro ki wuzmê çetıniya zımustoni amêne. Na waxt de honde vengê theyr u thuri niamêne mordemi gos. Gege wertê sewe ra, dür ra düri zuraisê vergu têra biyêne. Roz ke bi roşt, hêmê gavanu ra zarancu qevnêne. Sukıtiya zımustoni de vengê her çi mordemi re wes amêne. İlam ke verva soni gılê Newle ra goyine ke wendêne…
Jüyo ke na veng hesnêne, karê xo ra vêrdêne, gosê xo nêne re vengê goyine ser, hata ke ae vengê xo bırrna. Zımustu‘ çetı‘ vêrdi vi ra. Wusari endi xo beli kerdi vi. Belek koti ve vore. Deru ra uwe xusêne. Belenzeru belekê werte vore ra mijdania wusari dêne. Roz ve roz tiji biyêne şirêne. Sıliyunê wusari zor kerdi vi. Hewrê vırêni reqay vi. Theyrê yavani pêro hewnê zımustoni ra heşiyay vi xo. Heli u serseleku riyê asmêni ra govende guretêne. İnu ke perri sanêne u riyê asmêni ra xo liyêne ra, mordemi nêwastene ke çımunê xo sera rabırrno. Dar u bırr, vas u vilık ra her ca xemeliyay vi. Her baveti ra dina bi vi reng u reng. Theyr u thur peyser cêray vi. Vengê inu ra roê mordemi oroşiyêne ra.
Heli ke çımu vera bi vindi, qelfê gorgeçinu asmên guretêne ra xo ver. İnu hetê ra qevnêne, hetê ra ki perri kuyêne. Govenda inu zövina jü ro de viye. Xeylê ke heni şi, dodıma çüta çüt cêra biyêne, her çüte hetê ser şiyêne.
Endi waxtê halêni vi. Her jü can zövina jü teles de dewrê xu ramıtêne. Çütê gorgeçinu sıfte kerdi vi, seveta halêni ca kerdêne sae. Darr u bırri sera xeylê ke perray ra, dara de mojêne gurete xo çım, nişti pıra, mendi. Na dare koke ra qolınde u çırre viye. Zof rındek, zof qeyim asêne. Gılê dare berz vi. Destê mordemi era cı nêkotene. Gılê dare gurlaği, pelgê xo lhapkıni vi. Pelgu ra hêmê zerri ra gıli tholde de mendêne. Seveta halêni zof mınasıve viye. Dormê dare de dı hirê komelê merxu reşti vi ra. Bınê her komeli de ya halênê kêsa ya ki halênê awrêşi bi. Komelunê merxi ra tenê düri kulerê dara qerte de mêsu pêtage sanay vi cı, zerrê dare ra guvaisê mêsu têra biyêne. Zövina jü dare sera sımorıku verdêne jümini dıma. Gorgeçinu, dara ke nişti vi pıra, xo rê kerdi vi mıqerrem. Wertê gılu ra feteliyay, cao ke halêni cı sanê, uza amey têlewe, dormê xo de dar u bırr sera nia da. Tiji asme nême kerdi vi. Germê peroji de hewazgê vay her çi rê wes amêne. Gılê dar u bırri jê hêlaneki saniyêne ra. Guvaisê mêsu u çhızaisê themuji kotêne tê. Dormê dare de dı-hirê dori perray ra, jümini ser de teqley eşti, cao ke halêni pêsanê, amey nişti uca ra. Hurendia xo ke kerde mıqerreme, endi sıfte kerd, koti telesê halêni. Şiy wertê bırru ra phezıkê bari çinıt we, eve pencunê xo onti. Phezıki çip sanay zumini, bıngê halêni sana pê. Qoro vırê‘ qediya, hama hona xeylê kar mendi vi.
Tiji kou ser de bi vi war, gorgeçinu jê qımıle gureti vi riyê asmêni ra. Qevnaisê inu dêne ra der u beri ser de. Çutê gorgeçinu ke na qevnais hesna, yê ki koti ra têver u têdıma, şiy, reşti qırçımo vırê‘. Eve toreo henên perri kuyêne ke, to vatêne, riyê asmêni neqesnêne. Lêlo qolınd ke sana cı, tenê düri ra vengê tufongu ame. Gorgeçinu govenda xo ca verdê, her jü hetê ser perray ra, şiy.
Çutê gorgeçini amey, nişti dara halêni ra. Sodır ke tiji kou ser de zereq da, gorgeçini koti telesê halêni. Zerê halêni şiax kerdene rê çamırre luzım kerdêne. Dormê deru ra çerexiyay, koti ke lhıma nerme esta, sanay pencu ver, ardi, zerrê halêni eve perrunê xo rındek şiax kerd. Zerrê halêni de çarali jê dıstarri çerexiyay. Çamırre rınd somotiye ra phezkunê bariyu. Mordemi heni zonêne ke quli eve destu vırasta. Qoro peyê mendi vi. Hona ke çamırre huske nêbiya, koti teles, vaso nerm ard, o ki zemeqna ve çamırre ro. Xeylê zametu ra dıma inu endi halênê xo bas kerdi vi. Eve sabiyaene halênê xo sera perray ra, jümini de koti ka u kelevut. Gorgeçina makêke waxtê pungalê xo zonıtêne. Endi koti vi haku. Hakê xo pungal de vetêne, tenê ke pê biye sa, kotêne ra qelfê gorgeçinu, hewa ra jê vatena xo perri sanıtêne, eve esq u çêf kotêne govende. Ae zonıtêne ke, eke biye khurte, niste haku ser, endi na çêf u govende ra bena morıme. Haki endi reşti ve pê, inu nêwastene ke halênê xo ra düri kuyê. Tenê waxt ke perray ra, pizê xo kerd mırd, onciyay, amey, pia nişti haku ser. Her roz tenê halêni sero mendi, tenê ki perray ra. Roz ve roz hevêna derg pungali sero mendêne. Tania lese ke rınd biye berze, endi halêni sero mendi. Waxtê, vêsani u têsaniya xo rê damis biy. Waxtê ra dıma endi teqete ra koti. İnu halênê xo thol nêverdêne. Jü ke şi, pizê xo kerd mırd, teko bin halêni sero mendêne. Gorgeçino neri perra ra, şi, pizê xo ke kerd mırd, cêra ra, ame halêni ser. O ke ame, na rae ki gorgeçine şiye. Gorgeçine hondo ke luzım nêkerdo, halênê xo sera nêlewiyêne. Çı ke ae nêwastêne ke hakunê xo ra jü bıxerrepiyo. Eve heştu perrê xo nêlewnay. Purtê xo pede rışiyay vi. Ae şênê xo çip nay vi re haku ser, cı rê beli biyêne ke endi can amo haku. Pede tey ğılğıliyêne. Endi waxt senık mendi vi ke leyri haku ra vejiyê.
Sewa de omnoni vengê tufongu hevêna nejdi ra ame. Wertê sewe de qersuni jê çhike adıri hewa ra bılişkiyêne. Gorgeçini pırkay we, amey ra qoru ser ke raperrê, oncia peyser halêni sero mendi. Çıke na waxt seveta haku waxto de çetı‘ vi. Gure o vi ke tani qe sera meonciyo. Qersuni ser u bınê dare ra jü vêrdêne. Jü, dı teni ki mavênê gılu ra, wertê pelgu ra vêrdi, o dust de gınay hard ro. Gorgeçini çığa ke bıtersê, oncia ki halênê xo sera nêlewiyay. Sarê xo sana jüvini, perrê xo sanay dormê halêni, ero sukutiye pite.
Riyê asmêni ra hewrê tariy amey vi pêser. Heni asêne ke vortis qewetıno. Waxto kılm ra dıma bılısku kuya pa, hewri reqay. Hetê ra ki va heni ke guvêne, mordemi vatêne, nıka dar u ber hurendi ra qılayneno ra. Hona va cê nêvışiyay vi, torge kerd pıro. Gorgeçinu halênê xo torge ra ki xelesna.
Hako jü endi rınd amey vi ra can, waxto ke vıla vo. Vêsaniye onci kar kerdi vi. Gorgeçin perra ra, hetê hêgau ser şi. Pizê xo ke kerd mırd, dı-hirê têlê genımi eşti ra pencunê xo ver, hetê halêni ser kot ra rae. Rae kerdi vi lete, vengê tufongu oncia têra bi, xeylê waxt cê nêvışiyay. Naver u bover ra jê torge qersuni vorêne. Vengê top u tufongu ra dar u ber zıngêne. Theyrunê yavani rê ki endi retiye çinê viye. Wertê na hengemi de jêde nêmend, gorgeçin hewa ra bi ve boka qersune, wertê gonasüri de gına hard ro.
Gorgeçine halênê xo sero teyna mende. Ne uwe ne ki qut restêne cı. Vêsaniye ver bi vi tulegıne. Ae zonıtene, çı waxt haku sera rawurzo. Leyru ra jü endi zerrê haki ra vejiyay vi tever. Leyrunê binu rê ki ewro u meste vi. Endi haku sero mıqerrem mendene luzım nêkerdêne. Leyro vırê‘ vêsaniye ver çhivnêne. Gorgeçine eve xo ki vêsane viye. Halêni sera wuste ra, tenê xo vêzna ve we, lesa xo gızgıznê ve ra. Xo de vet ke teqeta xo biya kemi. Perrê xo kerdi hira ke raperro, perri niamey ra ver. Halêni sero perri cêray vi ra ver. Heni zonêne ke qeremiya. Wertê gılunê dare ra feteliye, seveta xuy u leyrê xu werd kerd sae. Gılunê dare ra muleçıki feteliyêne, nıkıle dê pıro, taê gula xo ra kerdi war. Wastêne ke pizê leyrê xu ki mırd kero. Çhiv da, şiye gılê dotêni ser, nia da ke lizgê dare ra teftır oncino, vılê xo kerd ra derg, nıkıle dê ve pıro, teftır pê guret, leyrê xo rê ard. Roz ve roz leyri vejiyêne tever. Gıl ve gıl feteliye, bınê pelgu kerd sae, eve kerm u kevzê dare pizê xuy u leyrunê xu kerd mırd, hata ke qewete amê perru.
Hona dı haki vınetey vi. Gorgeçine hurd‘ haki ardi xo ver, nıkıla xu dormê haku ra çerexnê, nia da ke hona caê de qılas çino. Şênê xu na re haku ser, leyri onti bınê perrunê xo. Leyri bınê perru de ğılğıliyêne, eve vengo bari hurdi hurdi çhivnêne. Tania mae ve leyru ra dêne ra jümini. Hurd‘ heti ki halê xo ra raji vi. Gorgeçine halê xo rê berxudare viye. Ae hakê xo telef nêkerdi vi, ğerza dı tenu pêro amey vi ra ro. Yê dı teney ki sate u dequ sere vi. Theyr u thur onciyay vi halênê xo. Sukutiye day vi ra tariyê sewe. Bınê her komeli de, khulêrê her dare de zöbina jü cani çê sanay vi cı, tey weşiya xo ramıtêne. Riyê asmêni ra astarey bılişkiyêne. Asme hona pırr nêbi vi, jê sarê vastüriye asmê‘ ra bılişkiyêne. Qırçımê malê koy eve bıjêkune xo ra amey, bınê dara halêni de oreşiyay ra, tenê ke nisorr kerd, kot ra rae, hetê derê Avjêni ser şi.
Kesa halênê xo bınê merxe de vıraşti vi. Waxto ke tiji cêriyêne de, a ki onciyêne halênê xo. Leyrê ae pêro haku ra vejiyay vi. Pêro hona zof hurdi u qafıke ser hona nermık vi. Halênê kesa ra tenê düri bınê zövina jü merxe de halênê awrêşi amêne diyaene. Leyrê awrêşi reng u reng vi. Hardo dewrês her cani rê mekan vi, her cani neşivê xo cı ra guretêne u weşiya xo ramıtêne.
Lêlê sewe de sıfte gırmaiso de qewetın qılaiya ra, veng da ra ko u gerısu ser de. Can u cuyil pêro eve ters perra ve xo ser. Na gırmais ra dıma onci qersunu hewa ra çhiv da. Bêvengiya sewe hengame de mendi vi. Qereqoli bombê kıle sanay gême, palaxe u sakilo husk kot ra kıle ver, wertê satê u dequ de kıle her ca guret ra xo ver. Kıle da ra gılê daru ser. Dara halêni wertê na kıle de mende. Leyri hona nêşkiyêne raperrê. Gorgeçine eve ters u teles dormê dare de çerexiye. Ge niste pa, ge perrê ra, nêzona ke se bıkero. Hetê ra qevnêne, hetê ra perri kuyêne. Nêzonêne ke kıle rê çutır mane vo. Tania adıri ra leyru tevat nêkerdêne ke zerrê halêni de vınderê. İnu boyna zerrê halêni de çhiv dêne. Çı hêf ke perri niamêne ra ver ke raperrê. Gorgeçine nia da ke kıla adıri her ke şi, bena nejdi, xo da ve halêni sero, pencê xo day ra, wast ke zerrê halêni de çı ke esto, pêrüne jü rae de bıjêro, era hewa kuyo. Leyru ra dı teni kot, ra pencu ver, dı haki eve leyrê ra halên de mendi. Qewete hona rınd perru niamey vi. Çığa ke destebere ame, zor da ve xo, eve çalım hervi hervi perrê ra. Dü eve kıle ra mezal nêdêne. Leyro jü wertê pencu ra xeleşiya ra, gına wertê kıle ro, bi ve çhive – çhiva xo. Gorgeçine tezıka xo est ra ser ke bıxelesno, leyro ke wertê pencu de vi, o ki gına waro. Kıle yê canê tezê nazıki desınde quletnay ro. Gorgeçine eve vengo de dezın qişte, çıxa ke vengê xo vejiya, wend. Kıle sera perri kuyay, wast ke kıle wesayno. Kıle sana cı hurd, perri vêsay. Dezê leyrune xo ra dezê perru xo de nêvet. A hona rınd pê leyrunê xo sa nêbi vi, dı teney ki hona zerrê haku ra tever niamey vi. Wertê dü u kıle de xo çarna ra halêni ser. Kıle dormê halêni gureti vi ra xo ver. Leyro ke halên de mendi vi çıxa ke veng cı ra vejiya, heni qewetın çhika, çhiva. Gorgeçine kıle gos nêdê, xo est halêni ser, eve omıd u qeweta peyêne wast ke halên ra canê bıxelesno. Pencê xo day halên ro, leyr jê topê adıri kot ra pencu ver. Ae xo de nêvet. Hona dare ra düri nê koti vi, lesa xo kıle de mende, jê kosaviyê adıri gınê hard ro.
Kıle jê dêvi çı ke ame ra ver, sıpıt we. Dar u bero khulêlık ra pey de teniya şiae mende. Eve heştu kou sera dü onciya.