Ma bê xer Pelga Mısletê Dêsımi,
rınd ke tı esta, rınd ke name Dêsımi ana ra zu. Mordemi zonê xo ke nenusna, ero kağıt u kıtavu nesana qe kifayite xo çino.
Raver mı nas kere. Ez Pılemoriye ra pêê Pırdosur de, Gola Tikmu rawu. Mı mektevo jede ne wendo, pêro pia phonc serri şine mektev. Nıka weşiya xo paytextê Austurya Viyana de ramen. Ez hona newe Pelga Mısletê Dêsımi rê nuste rusnen. Mı be bıra Hasan Dursuni ra heni qesy kerd. Mı merdıgan sanıto serrunê 80ê. Ez kultur u itıqati sero çı ke vira mıde mendo êy nıvisnen. Beno ke rozê sıma pêrune rê lozım bo.
Nustê mıno ewroen malo pheskovi serao. Malo pheskovi made ça jargiyo, dêy sero tene xo bıqefelnime!
Dewa ma wayirê jara. Cıra Jara Çê Tikmê Arezu vanê. Na dewe de cem ceriyêne de, cemati biyêne. İqrar u kewraêni dêne jubini. Rispiyê na dewe ap Dewres bi, ma jede çi fekê dêy ra mısayme. Ap Dewreşi xêylê serri verna bi ra, herdisa xo sıpe biye, xêyle ki derg biye. Sarê xora khulê bi, dorme piştene têra. Roze ap Dewres verê waru de kemere sero ronişto, qesey keno. Ma domoni dorme de ameyme pêser. Domonu ra hergu ju çiyê pers keno. Ap Dewres perune salıx dano. Xêyle persu ra dime mesele ame gine ro male peskovi, malo khır. Malo khır hetunê made zof bi. Pêrune vatene, qerqesune değme malo khır merze! Nia tarıf kerd. Xızıro ke gilê kouna niseno ro astorê qırri, vore de tozıke vay dano, sono tenga feqir u fıqari de reseno cı, o mal malê dêyo. Raa made marê jargiyo. Pi u khalikê ma goştê dêy marê kerdo tomete. Sıma ke yinu vinenê, değme kemere cı mesanê, qarsê dinu mebe.
Sima ke vas çinenê gereke heqa dinu tey biçinê. Velg, sımer çı ke dane mal u gaunê xo heqa dinu ki tede ra, değme xo vira mekerê. Zımıstan ke ame yinu wesa meverdê. Gegeane zımıstan dewe de heme keşi çi nênera taug, vore de berdene dewe ra düri kerdene ro ke, o mal bero buro. Zof rêy vore de mendene, dewe ra şiyene ye xelesnene ardene, çê de dine rê koz vıraştêne, kerdêne weyiye. Wusar ke ame berdêne verdêne ra. Ye orte malê şiay nêkerdene, cıke mali ye iştiri kerdêne. Coka caê dinu bırnêne ra.
Ma nıka vame malê pheskovi vereme ra! Hama, hên niyo, yi pêro wairê namune. Çıtur name keme? Nae ke iştiri çinê, lese ra qıskek asene, yine ra malo khır vame. Nae ke gırs asene, iştiriyê xo derg u govikê, dinu ra ki malo pheskovi vame. Bıza pheskoviye, kelo pheskovi. Orte ninu de en qedirgiran made bıza ke bijek dimeraê iyê. Vane, hurdiye xo dima re. Ma wertê xode namê Xızıri no ninura. Cıra vame Malê Xızıri. Dewa made ez ke hesarê xo bine-nêbine mı hona nehesno ke ju tıfong çarno ro dinu. Raa made, Raa Haq de, yanê Aleviyenia made caê xo çino.
O Xızıre Kou be Kemerê Duzgıni u jar u diyarê ma na zonê ma sıma verde terê awe kero, sıma pero qesey bikerê, bıwanê, bınusnê. Nusto bin de sımarê “kewraêni çıtur cerina de, ae ana re zu.
Bımane weşiye de…
04.12.2017, Viyana