Çiyo ke vırênu ra, khalık u deku ra mendo, mêraso.
Mordem gune mêrasi rê wayır bıveciyo, qımet cı do, bısevekno, bızêdno, azo ke yeno babokê dinê bıkero.
Çiyê ke nıka ma dest de rê, dewi, suki, baĝ u baxçei hata be zon u zagoni ma rê mêras mendê.
Babokê maê.
Hetê ra ki dênê vılê maê.
Cokao vanê, ma na dinae, domanunê xo ra dên gurêta.
Mêras de emeg esto, araqê çarei, heştirê çımu, roştia aqıli, teqata zoniu, gonia nêçê teneu, xatırai estê.
Mordem ke wayırê mêrasê xo mebo, bıwero, çarç u çurç kero, bıqedno, be xo ki qedino.
Cı ra viçê nêmaneno.
Zê palaxê payızi vaydino ro, zê hewnê zurekeri beno vindi sono.
Mordemo nianêni rê mêraswer vanê.
Mêraswer thaba nêkeno.
Teyna weno, sımeno, fetelino…
Zê ju serxoşi her qeyde de cıneno, her veyve de reqeşino.
Zê ju berdoşi werdê xo ver de, qesa xo phoşti de ra.
Caverde leya de terne rono, sono dara ke meywe dana, bırneno vêsneno.
Ne hêrgê xo vezeno, ne ki vizoê hêgai rameno, sono gaê cıti sarebırneno weno.
Xapa sıti ra vecino, manga roseno, çar qurış pere kuno desti, ron u thoraqi, mast u doi herneno.
Teyna kar u gureyê dewi de nê, mêrasweri her ca de estê.
Vacime, qeyde sarri cêno, lawıkê qomi caê ra, juyê ra hêsneno, dı-hirê çekuy vurneno, vano ê mınê.
Serba mêraswer her çi teyna ê roten u werdena.
Fırsend ke bıvino, dest ra ke bêro, derd u decê qomê xo, astunê khalık u dekunê xuyê ke aşeu de, mıĝareu de mendê roseno, weno.
Hetê ra ki xo ra teber kesi nêvineno.
Fek de teyna „ez“ esto.
Nêzoneno ke, tı, a, o, ma, sıma, inu ke mebê, „ez“ ki çino.
Zamanê dey teyna „ewro“yo.
Vızêr, mestê, biro çino.
Qayılê çiyê, kesi niyo.
Vacime, taê amê têlewe karê kerdê, bımbarek bo nêvano, desinde vano, hira niyo, derge niya, felan kes tey çino, a qese heni nênuşina …., mane dıma rao.
Teyna gerreciyo.
Lengerê pırdi ra kemeri gınê waro, vana, bê, reyna bıvırazime, o vano, hostai rınd nêvırastê, helbet nia beno.
Hezaji vaa hêgai berda, o vano, çıra reyna bıvırazime, xo ra dı-hirê serri ra tepiya hezaji yena.
Se kena bıke, mêraswer karê nêkeno.
Cae ra qese vineno, juyê mane keno, çiyê museno, raa xo ra nêvecino.
Rocê yena her çi dest ra vecino.
Bax u baxçeyê xo benê vêran.
Hêgau va u awe benê.
Boni gınenê pıro, benê pagi.
Zon u zagonê xo beno vindi, çekuya de germe fek de nêmanena.
Mêras ke qediya, nas u dosti ki qedinê.
Reê niadano ke, teyna „ez“ mendo.
„Ez“ ra teber kes çino.
Tı, o, a, ma, sıma, inu ke mebo, „ez“ ki nêbeno.
Zê ju mostıra werte de maneno.