Mordemi estê
rocê benê, rocê ki mırenê’.
Na sate u na helm de qalê dina nêanimê era ra …
Mordemi estê
‘rocê benê, aj be aj roenê’.
Ma na sate u na helm de ‘zem’ u ‘dem’ê (d)ina be qısaweta (d)ina dêrime.
Ma,
ma u pi be pirik u khalıkanê xo ra,
ced u celelanê xora,
hêni heşna, hêni fam kerd ke,
mavenê ‘(nê)biyene’ u ‘çi’ be ‘biyene’ u ‘cani’
muyê de bariye ra,
ebe ‘fam’ u ‘fıreset’ be ‘aqıl’ u ‘fam’i ra bırino ra.
Ebe ‘fam’ u ‘fıreset’ be ‘aqıl’ u ‘fam’i ra mordem
ya haşarê xo bo, dêsê de caê xo bızano/bıcero;
ya ki,
ma vacime,
gere ze kemerê de çengi, bıtaşiyo,
ze kemerê de çağıli, bıweriyo ke,
pherıga çêverê ‘sır’i cırê ayan bo.
Jü dês de
her kemere,
her xiç
hatani be kemera çengi
ebe ‘çiv’ê ‘a bine’ ca dana xo, çekrarê xo cena.
Kemere be kemere
xiç be xiç
ebe ‘ê bina ra pia’ hona benê ‘dês’.
Jü dês kemera ra vırazino, mı qıda, kemera ra!
Ebe ronaêne u nijnaêna
her jü kemere be kemere ra,
her jü xiç be xiç ra
dês caê dano xo, beno dês, beno mıqerem.
Çerexina beno hewş, beno bon.
Şemıga heqiye kuna cı,
bertengê xo, silbagê xo beno.
Siya xo bena, bena gıran u daim,
-destê Xızıri ra-
rocê ki zaw u zeçê ma be
me u matê ma rê bena sıtarê.
Mordemi de ‘fıkır’ u ‘zıkır’i ki nianeno,
eke teyna u xo serra mend,
‘nêtaşiya’, ‘nêweriya’
ne beno ‘MISLET’ ne ki beno ‘QOM’.
‘Mısletê Dêsımi’ cad u mırad ra,
fıkır u zıkır ra,
veng u rengê xo rê,
xobexo sıtariye wazeno,
na sıtarê rê hawariya têare/têlewe amaêna ‘Mıslet’i keno.
Veng ro mılet u qomê xo keno,
venga mın u to be, ma u şıma pêroine dano.
Ya ki
-raşta xo ra ke vacime-
ma veng ro jübini keme,
momi u sılaiya xo dame jübini,
hazarime;
se ke ma qal u bela nat ‘iqrar da’ jübini.
se ke iqrar de aj be aj ra hazariyayme.
Ez par u hesa xora, hust u rıza xora van:
Ez çivê de nê dêsiya, wazen xiçê de nê dêsi bi.
Ez leşê de nê qomiya, wazen canê de nê qomi bi.
Şıma çı fıkırine u çı zıkırine, mı qıdaenê?
Mı qıadaê şıma
şıma dêsê kami de benê xiç?
desê kami ra (- rê) kemer oncenê
Hona ke kemer u xiçê şıma peşê şıma derê
Hona ke veng u vacê şıma vecino!
Wertê ma de çüyê Heqi esto, xo vira mekerê!
Roc u şewê Xızıri 2017 – Êli Bıra