İtıqatê Dêsımi de dı çêveri estê. Jü çêverê xêreo, jü ki çêverê şereo. Mordemi ke nia mesela de nia da, qerar daena xo bena rehet. Çı ke na mane de xêr u şere cêser fiştene reheta.
Nıka referandumi sero ke qesey beno, xêr u şere cêserfiştene hondê rehet niya. Çı ke ferqa wertê xêr u şere nêmenda. Çıxa ke dı ray vecinê ma veri ki, qe jüya de xo alternatifê de rınde niya. Keso ke vaco raê de bine esta, ya ki bıbo, şenıkê. İna ki afaroz kenê!
Hêya, verba RTE veciyaene de, yanê “nê” vatene de nişanê de xêr esto. Hama, no nişan nişanê xelasa Anadoliyeo, nişanê xelasa Dêsımiyo? Dêsımıca rê raşta ki çêverê xêre keno ya? Ez qe guman nêken. Mesela mesela zihniyet u sistemiya. Ni ke nêvuriyay ne çêverê xêre beno ra, ne ki caê ra hebê roşti erzena.
Şanıkanê made vanê, “(…) to ke xo eşt ra vosnê siay ser, to beno haut qati bınê hardi”. Mıra hêni aseno ke ma “hêya” vacime ki, “nê” vacime ki vosno sia ma verde vecino. Ma gereke sistem de nia dime, cıra çı pac beno ae sero bıfıkırime.
Perse nawa: Sistem ça vurino, ya ki vurnenê?
Axıri çıxa kêmi bo ki, na waxto pêên de parlametoê Dewleta Tırki de zobina vengi ki veciyêne. Hetê ra Kurdu, hetê ra Çerkez be Lazu kamiya xo parlameto de ardêne ra zon. Hermeniyu qalê xo ardêne ra. Yanê bıngê Cumuriyete, tek jü zon, tek jü qom, tek jü itıqat ebe na qêyde gıran gıran bo ki rıjiyêne. Nasyonalistanê Tırk-İslamista parlameto ra êndi omıdê xo bırno. Coka cerebnenê ke jüyê de Busılman/Musılman (Sunni) u Tırk her çi bıcêro xo dest. Eke wacım kerd parlamento ki fes bıkero. Na mane de “hêya”, ya ki “nê” vatene zaf pere nêkena. “Heya” ya ki “nê” çı vecino veciyo sistem ebe çerxê xo gurino. No RTE nêbo, kam beno bıbo ferq nêkeno.
Ma, sitem ke vuriya bara marê çı kuno?
Qeweta ma şona çınay?
Ma çı wazenime, çı bese kenime?
Bêrê ma nae sero bıfıkırime.
Tıvacê sistem wertê des serra de çı ano werte? Sistemê eyaleta werte ardene, ya ki diktatoriye! Mı çım de raa werte ardena diktatorêni ki sistemê eyaleta ronaene ra vêrena ra. Yanê nasyonalistê Tırku bıwazê, mewazê ki konjüktüro siyasi ina na mane de keno mecbur.
İta de hirê ray Dêsımıca ver de estê:
- Siya Tırku de weşiya xo ramıtene.
- Siya Kurdu de weşiya xo ramıtene.
- Ya ki, xoseriya Dêsımi waştene.
Çıxa ke çetın bo ki ma gereke raa hirêine bıcêrime xo ver, ae sero bıfıkırime, bıgurime.
Na mane de “NÊ / XÊYİR” vatene ki xêr bo!..
19.02.2017