Malqoç de awe çinê biya. Apê de piyê mı biyo, şiyê awe Hakıs ra, Kuzur ra arda. Eve gauna şiyê, meski kerdê pır, bar kerdê, awe arda çêu. A taw şiye deru de rovar kerdo.
Cıra Khaliyê Hemedi vatêne, apê piyê mıno; rozê hewn vênêno. Hewn dê mordeme kê de hêrdise sıpê cıra vano, Khali na manga xuya sure bıde mı, bınê dare de qilikê awe dan to. Cırê ca ki beli keno. Hewne xo qesey nêkeno, cêniya xo raa Heqi de zof ramaniye bena, o gırêdae beno, qesey nêkeno. Vano, nıka ke qesey bıkerine, manga bena sare bırnena. Sewa bine onca hewn vêneno, onca mordemo kokım vano, Khali a manga huya sure bıde mı, bıne a dare de qilikê awe dan to. Vano, hewno mı diyo, se ke vajine, xanıme manga sare bırnena.
Xanıme ki waa Ap Aliyê Doyi biya. Çêna apê xo arda. Sewa hireyinê onca aynı hewni vêneno, kokım vano, dana bıde, nêdena kemera tüya bini vezenu ro ser, iye ser ki ken bın. Pereno we, cêniya xo vana, bısımlay, lazê api sebi, to hewn di? Heya, mı hewn di, vano. Vana, ma hewnê xo qesey ke! Vano, na hirê sewiyo ke pêsero nia na hewn vinên. Hewn de mordeme de kokım mıra vano, manga huya sure bıde mı, bınê darede qilike awe dan to.
Cêniya xo vana, çêvêsae, ma itara some Hakıs, hêniyê Kilişi ra awe ame, ma qilike awe ke dano ma, marê besa. (Hêniye Kilişi Hakıste rızna talan kerd, hurendi de dukani vıraşti.) Vana, kamij dara? Vano, fılan dara. Cêniye sona desınde çılu vırazene, veng dana pera xo, vana, bêrê Bava Khali hewn diyo, manga sare bırneme. İnam nêbene, vanê o pexilo, o sare nêbırneno. A ki lerze kena ke bêrê derhal sare bıvırne. Vana, çêvêsae, kemera bın vezeme ser, iye seri keme bın, serva ju manga! Nıka manga, heq gukê dae na bine de ki dano, sıtê dae na manga bine de ki dano. Sare bıvırne, cao ke tora vato uza ra de, awe vejina.
Cao ke vanê awe vejina, nia polike çermal bi, khewe kerdene, mali werdêne, onca biyene khewe. Çılu fina ra cı, manga ana tever, bene a hurendi de sare bırnenê. İye bini ki kelu bene, vosnu bene sare bırnene.
Persenê, Khali koti bıkınime? Khali tarif keno, nejdiye hire metroyi kınêne awe vejina. Tenena kene xori, je tendure gıloruk dane ra, cêr ro awe erzena ser. Na rae ki, paçi ra dorme rındek şauğ kene ke awe zolol bêro. Awe gozenê ra, erzenê tever hata ke awa zalale erzena ser. Gostê qırvanu ki a awe de pocenê. Eve na qeyde Hakıs ra awe ardene ra xeleşinê…
Dewe ra mordemê şiyo Hakıs, meske kerda pıre, amo Nisanune Oli; juyo Karsanızı ki amo, şiyo Dêrüye. Dota amo eke Malqoç de zelemela, bervenê. Sadıqo Karsanız veng dano, vano, bava, ne sebiyo, bava nê sebiyo? Vanê, thawa çino. Khali hewn diyo, do ra, awe veciya, horê ivadet kene. Venga cı dane, vane, bê qırva bure. Sono qırvane xo weno, e bini ki kal dane cı, terkneno sono Nisanunê Oli de rastê Khalık Phıt Ali (Bava Nesemi) beno. Vano, Bava Nesemi, ez têste merdune. Vano, la lao, domonê mı têste çê de qır bene, tiya sona, hêniye Kilişi vıreniya to dero, oca awe sımena. Vano, bava to kotira na awe arde? Vano, hêniyê Kilişi ra arde. Vano, bava tıve wayirê xo kena, na Nisanu kena ez têste merdune. Nêwano Malqoç de awe vejiya qırva kerdo. Vano, mı Keskeware de tene soji qarmeşi werdo, uza u ita bine têsa, awe bıde mı. Xo nia nano kemer ra, verde vındeno. Vano, feke mesge rake tene bısıme. Vano, hêni nêbeno tı vera weda, ez bêrine hurenda to ke bısımine. Se ke vera vejino, sono dı hirê gepi sımeno, a qult awe verdano kurnuka Nisanu, verdana uza.
Vano, buko Hêq bela xo ve to medero, mı uza ra kerda phoşt arda ita, je roşta çime xo, ça verdana de?
Vano, pirê mi awe Malqoç de veta.
Buko, çevêsae, Khaliyê Aliyê Kudi de ware to mesano, jur meke, eve juru memıre, Malqoç jup u juao.
Vano, o wayirê to Kud bo ke, ez dota amune, awe veta, uza qırvani sare bırne; Bava Khali hewn diyo, bınê e darune bınenu de do ra, awe veta, qırvani ve a awe pote. Tı itara na awe kena phoşt bena se kena! Keno ra verdano uza. Vano, Heqo fekê to sero zoti mede.
O kuno Nisaunê Jêlê, o bin ki kuno vıradê Mazra Sure, veng dano cı, vano, Sadıq, Sadıq! Ero buko to xora awa mı verda de, ez zoti toro nêdan, eke raşti awe nêvejiya, ez xore raceri, hêniye Kilişi ra xorê meska xo pırkerine, biyairine.
Vano, pirê mı so, eke awe çinêbiye, Heq verdê vad bo ke, qatırê mı esto, tore awe bar ken oroja Kurderi de rusnen…
Çime: Xal İmam AKMAZ
Waxt: Gujige 2017
Ca: Ostomol