Xızır bojiyê hazır u nazıra bıcero,
ê ma ki heto jü ra.
Ma be xêri,
Heq demê şıma be xêr kero, xêr u weşiya şıma wazen u ebe himetê wairi u keremê şıma ra dı çekuya ki ez par u hesa xora wazen safi kerine.
Heqo tı meşermayne.
Name mı Şengala. Name pirikê de mano, no be mıra. Heq rama xoro cıkero, a ‘xas’e biya, ca u rumetın u çêo de bımbarek ra biya. Der u cirani ki ke namê pirika ma do we, ‘Dake’ kerda ver. Mırê o namo rındek biyo par u hesa, biyo meresê serrê zerriya mı.
Seranê xo şıma ra nêvan. Emrê xuyo zêde mı viyarna ra. Lewê mıno pilane mı dest ra, maa dı çhelıkana.
Lewê mı onciya pilanê mı dest ra, hatani ke şiya mêrde, dıma ki dirê serri tepia mı jü Zonê Ma ra qeir zonê de bin nêzanıtenê.
Çê ma bar kerdi bi, ma amayme be Estemol, der u dorê ma tırk u tat bi.
Çe vıstewranê mı de vêyvê de xo Tırki, jüê de bine ki Khurmanci qese kerdenê. Hêni roce be roce mı ki xo dabe nê zona.
Ewro Khurmanci de hal u kêf ra dot zaf çi bese mekeri ki, ebe vatena el u qomi Tırkiyê mı ‘ze Tırkiyê Tırkano’. Heqi ra a be şıkır.
Heqi ra şıkır van, çıke zon zanıtene be zon musaene rama Heqiya. Hama mordem xovira mekero ke emrê Heqi ki zonê bav u khaliyo.
Çı ke, her kes veng u rengê xora gırano, çıtur ke vacino: kemere gırana, caê xode. Heq kesi kengerê verê vay mekero.
Se ke qalê cori ra fam beno u vecino ra werte, ‘Oxford ke bibiyenê’ ma ki uca, ya ki ke bibiyene mektebê de Zazaki de wendenê. Hama mekteb mıra weş, ez cıra safi biya. Xıtame qesi ke biyarine, mektebe Tırki ki mıre nasib nê bi.
Waxto ke her çêra domanê guretene ‘yatili’ ma u piê mı hurendiya mıde bırae mı qeyd kerd u ruşna. O ‘gae teberi’ bi, vıreniya dê de hona ekseriye biye. Tırki ki cırê lazım bi.
No fıkrê ma têdine bi. Dewa made ez teyna nêbiya, havalcoyê mı ki, zaf ke nê bi ki, bi. Mektebê Heqi marê bi atley.
Bınê bandıriye de hala ra hal weçine.
Mı hêni zanıtene ke her kes wairê bext u expaliyo. Bandıriya çiyê u kesi ki qe nêzanıtenê. Kes heqa kesi xıtım nêkeno, nêrameno be verê çêverê kesi, heqa dêra ê morum nêkeno.
Ma çê xora, der u dorê xora nia di bi, nia ki zanıtênê.
Oxro ke hêni nêbiyo; ma di ke, ne ke heqa ma, serde ki zonê ma mare kerdo ‘yasaq’ itiqate ma mare kerdo ‘yasaq’ no ne ke insani, ez hêni inam bena ke Heqi ki bıdacno. Heqo tı nêheqiya kesi lewê de, cırê kare meverde.
Ma heqa xo kesê nêheqi re helal nêkeme. Pırnıkanê dina ra Xızıro Khal fıtıl fıtıl biyaro. Na dina u ‘a dina’ de her dem u her waxt destê mano pesirê dina de.
Dawa ma dawa Oli diwaniya. Oli cıra perske!
Mı qese kerd derg…
İtade bırnen, xatırê xo wazen.
Destê Xızıri ra, av u rısk de ki bi, ez zaf serek bo ki dirê rêane bina de dirê qesanê bina ra, eke şıma ki waşt, şıma de mucıl ben.
Wekanê sılama.