17.10.2017ine de Eskeranê dewlete mara jü cano de bin guret, Gökhan Keskin kişt.
Eskera zaf nêzdi ra no pa, kişto. Eskera ke bıwaştêne weş pêguretêne. Hama ni wairê fel u emelê qefçıliyê, xêra Dêsım u Dêsımıca nêwazenê. Barbarina xo rêyna ispat kerda. Pêguretene ra gore nê, kiştene ra gore no pa. Qerqeşuna jüye mavênê buriya de, jüye sêne de, jüye bınê naki de, a bine ki qor de na pa.
22.10.2017ine Gökhan dardo we. Cêniya Gökhani maa dı domanana, 26 serriya. Mezele sero ebe adet u torê Dêsımi hem berba, hem ki şüari vatê. Ni şüara ra jüye bıra Xıdır Ereni qeleme ra qêyd kerda.
Şüara Gökhani
Zımıstano, herd serdıno
Gokanê mı dırbetıno
Biarê, soba verde cıle ra kerê, orğan pıra derê, Gokanê mı serde çino
Gokan kerdo odke, çêber sero kilito.
Nêvardanê ke ez rêy destê Gokanê xo pêbıceri
Gokan serê zerriya mı zandano
Way lemıne, way lemıne, way.
Na çıke biye, ‘be ma biye?
Bae, mı vat; so dest pêce mırê rêy vece bia.
Sebeno, herre senık ser kerê
Nêşikino xo raşt kero
Zê tımani, ancia vengê xo nêkeno
Nêvano ke, na çı wel u herra sıma kenê mı sero.
Ax wayi wayi, way lemıne wayi.
Dewlete kişena “işbirlikçi” vana. “Domanê Maê” koy kişenê “ajan” vanê.
Heq kesi wertê dı adıru de meverdo, Xızır derdê cigere qomê mara duri bero.
Hona ke qomê ma pêro pia welatê xo canêverdo jü fek ra verba cerbr u zori vecime, pia vengo berz ra vacime:
Beso, endi beso!
Dêsım de, Hardo Dewrêşi sero zorbaziya dewlete ki, cengê “Domanê Ma” ki nêwazenime.
Welatê ziyar u diyari rê haştiye lazıma.
23.10.2017