Jü mordemê de bê kar u bê gure, bê ewlad u bê tewlad, bê ğem u tığal rocê zanaişê xo sero fıkıriya. Çı ke zano jü be jü ğêal kerd, aqılê xora viyarna ra.
Wairê jü nami biyena xo sero bi şa. Xora manê namê xo persa. Manê namê xo nêzanaena xo cırê gıran ame. Bibe qesebendê Türk Dil Kurumu ra, herfa namê xo kerde ya, pelge be pelge, qasa be qesa têy nia da. Çiyê nêdi. Kewt xo ver, taê ki bi hêrs. Va, hala, hala!, se ke qesa namê mı ni qesebendi de çina? Zerê xo bi teng, xora persa, ma ez manê namê xo ça nêzan? Na nêzanaena xo cırê biye bar, bın de mend, fatasiya, araq çare ra şi.
Dıma koka qesa namê xo sero rêyna fıkıriya. Kıtabê ke têy estê, ina de dozê manê namê xo çarna, têy çiyê nêdi. Mordemê de baqıl u bilani ra bıpersi, va. Şi, persa. Axiri rınd-xırab manê namê xo ki musa.
Rêyna zanaişê xo sero fıkıriya, va:
Êz ki zana ke mordem gereke şewe rakuyo, roc raurzo. Ara, perociye u şamiya xo xora kêmi mekero.
Êz ki zana ke mordem gere ke ser de qalınd, germ de kınc u kolanê tenıka xora cêro.
Êz ki zana ke dina gılora, bımbarek qe nêşono xora, beno vindi pêê koy ra. Aşma zerde dina gılore dıma, dina gılore ki tijiya homete de dıma perwaz dera.
Êz ki zana ke Lenin u Stalini Rusya de, Maoy Çin u Maçin de, Castroy Kuba de, Enver Xoce Arnavut de, Mıstê Kori ki Anadoliye de mılet kerdo têra.
Amê viri ke ap Xıdır daima cıra vano, “Ero ça daim vana, Mao, Mao; rêy ki vace daê, bao!” Ya Heq no ap Xıdır mı ra çı wazeno nia, va u şew u roc sero fıkıriya. Hewnê şewe nêkewt çıma, xoxode mılmıliya:
Ez ki zana ke serê na dina gılore de mara nezdi Kurmanci estê, ina ra dot ki Tırk u Tati.
Ez ki zana ke serê na dina gılore de Khurmanci Khurmancki, Tırk ki Tırki qesey kenê.
Ez ki zana ke Rusya de Urız, Çin de Maçini, Kuba de Kubaiji, Arnavut de Arnavuti estê.
Ez ki zana ke Urız Ruski, Maçini Maçinki, Kubaiji İspanyolki, Arnavuti Arnavutki qesey kenê.
Ez ki zana ke serê na dina gılore de Khurmanc be Tırki zêderi Musılmanê; Urızi zêderi Xıristyanê, Maçini Budistê.
Êz ki zana ke Tırki vanê, Dêsım parçê de welatê Tırkiyo.
Êz ki zana ke Khurmanci vanê, Dêsım parçê de Kurdistaniyo.
Êz ki zana ke ma u piyê mı, der u ciranê mı be ilam ke ap Xıdıri ra vanê, qomê ma, mıletê ma, şarê ma, hometa ma, zonê ma, zagonê ma, kam u kesiya ma, esl u cısnê ma, welatê ma, hardo dewrêş be ziyar u diyarê ma…
Êz ki zana ke ni nia vanê, hama mırê ispati lazımê. Gorê vatena ni ispati ki koê Qafi de halênê Zümrüd u Anka de wedardaiye. Mırê ni ispati lazımê ke lazımê!..
Sebrê xo bi teng, va ke:
De şo!..
Ez ke raurzi, rae kuy, Koê Qafi ser şori mırê tomofilê lazıma, tomofile re ki şoferê lazımo. Kınc u kol, werd u şımıtene be malzemey rê ki remorkê be gurekari lazımê. Raa mı ke derya u dengız reso, mırê papurê, papurê rê ki reis, reisi rê ki tayfa, tayfa rê ki erzaq lazımo. Nine pêroine rê ki perey lazımê.
Se ke qalê pera aqıl ra vêrd ra, xeşarê xo bi. Anciya ki mutala xo ze şanıka bıza kole biye be derg.
Qerar da, waşt ke raurzo, ere rae kuyo, koê Qafi ser şoro.
Nia da ke der u dorê xo tıng u tariyo,
xora nêdi ke lemboe era cıfiyo…
30.12.2013, Pulêmuriye