Ma be xêr Hometa Dêsımi!
Vızonıki kemerê wertê çhem u golanê. Mordemi ke waşt ravêr şêro, bend u gola ra bıvêro ra bover vızonıki kar u gurê de hewl cênê xo ser. Mordem ke ebe fend u usıl vızonıka sero vêrd ra hem rae cêno, hem ki xo ağwe u çamure ra qori keno.
Manê Dêsımi rê wairêni kerdene de serranê 80ê ra nat ebe qeyd u de usulê gami erziyay. Xêlê vızonıki amay ronaene. Diaspora de, Türkiya u Dêsım de zaf pêseroki, kıtabi veciyay. Kar u gure ebe nina nêmend, xêlê cemati niyay ro. Ninu ra federasyoni pêda bi. Kar u gure ebe na qêyde ame rêşt ni roca.
Nıka beno ke taê vacê ma eke hêni bi ça Mısletê Dêsımi?
Çıxa ke zon u kultur, itıqat u kamiye be coğrafya Hardo Devrêşi sero kar u gure bi, hetê temsiliyeti ra çı hêf ke her tım kêmasiye mende. Manê temsiliyetê Dêsımi ra karo de nianên elzem bi. Vızonıka kar u gurê xo dibi, çığır bibi rae, endi menzil asêne. Yanê ebe zêdaiya fıkr u zıkranê Dêsımıca raa temsiliyeti asena.
Sebeta gamê de nianêne hurênaişê ke zerarê xo reseno homete inu ra duri biyene u zereweiye lazıma.
Ma hurênaişê xuyê seranê 1980ê ra nat zanenime ke kıramete hurênaene de niya, ebe hurênaene kar u gure hal nêbi, nêbeno. Hekmete kok u bınge dera, xo rê wair veciyaene u wairêni kerdene dera. Ê her dewe, mere u warey, ê her kesi ki aşir, per u hezveta xo, çê xo, caê xo, namê xo kıfşo. Dêsım êwê ke tede manenê, weşiya xo oca ramenê welatê ine têdineo. Hama ma, cao ke ebe zor u zorbaziye; ebe siyaset be dek u dubara nıfısê ma kerdo tever, hurêndiya ina de nıfıso biyağki ardo kerdo cı, qebul nêkenime.
Coka ma têde namanê xo rê wair vecinime, qimetê kamiya xo ra nêverenime ra; sebeta pay ra mendena Zazaki/Kırmancki cad kenime, ebe vengo de berz vanime:
– MA ki Hardo Dewrêşi sero, wertê qomanê Anadoliye de veng u rênga ra jü veng u jü rengime…
Sıfte 19-21.02.2016 de Almanya Zwingenberg de Têareamaena Ronaena Mısletê Dêsımi biye. Ebe na têareamaena qerarê Mısletê Dêsımi ronaene ame guretene. Dıma 18.06.2016 de ki Estemol de têareamaena de nianêne biye. Gami erziyay, sebeta kar u gurê ni gamanê hewla heceti lazım bi. Nina ra jüye ki pelgê de interneti biye. Na pelge xızmeta Ronaena Mısletê Dêsımi dera…
Kılmek ra na pelge, kesê ke wazenê kamiya xo eşkera biarê ra zon; welatê xo araze tarıf kerê; zonê xo rê bê şerm u bê qısawet wair veciyê, qesey bıkerê u bınusnê; gorê waştena xo itıqatê xo bıramê; meresê ma u pi be pirık u khalıkanê xo rê bê ters u bê şık wair veciyê; haştiye u têduştiye xo rê bınge bıcêrê; raa demokrasi ra şorê, xızmeta ina dera.
Na mane de pêro Dêsımıca rê sılaiya; bêrê ebe fêl u fıkrê xo, vaten u nustanê xo Dêsımi rê wairêni bıkerê.
Bımanê weşiye de.
30.07.2016
Hasan Dursun
Bir Yorum
Asmén Ercan Gür
“kesıké vejiya seré daré
tu mıré biya yaré;
çé ma şen vi gulistan vi,
ça xafılfdé bar kerd şiya varé…”
tu xer ma; péla Désımi, qomé maré biya roştia Tija Homete, Tija Bımbaréke…